|
Samþykkt um hundahald í Seyðisfjarðarkaupstað.
Almennt - stjórnsýsla.
1. Hundahald er takmarkað í Seyðisfjarðarkaupstað með skilyrðum samkvæmt samþykkt þessari.
2. Dýraeftirlitsmenn.
Sveitarstjórnir annast framkvæmd samþykktar þessarar og geta ráðið sérstaka dýraeftirlitsmenn eða falið starfsmönnum sveitarfélaganna hlutverk dýraeftirlitsmanna. Dýraeftirlitsmenn geta leitað aðstoðar lögregluyfirvalda, ef og þegar þörf krefur, t.d. ef hundur er að mati eftirlitsmanns hættulegur umhverfi sínu og/eða vörsluaðili hundsins tálmar starfi eftirlitsmanns samkvæmt samþykkt þessari og almannahagsmunir og/eða heilbrigðissjónarmið valda því að nauðsynlegt er að leita atbeina lögreglu við að fjarlægja hund. Að öðru leyti starfar dýraeftirlitsmenn undir eftirliti og á ábyrgð heilbrigðisnefndar við sín eftirlitsstörf.
3. Þéttbýli - dreifbýli.
Með þéttbýli er átt við þyrpingu húsa þar sem búa a.m.k. 50 manns og fjarlægð milli húsa fer að jafnaði ekki yfir 200 metra (sbr. skipulags- og byggingarlög 1997 nr. 73/1997) nema ef sveitarfélag hefur skilgreint þéttbýli nánar í sínu aðalskipulagi.
4. Dýravernd og ræktun.
Samkvæmt lögum um dýravernd nr. 15/1994 fer Umhverfisstofnun með mál er varða dýravernd.
Um ræktun og sölu hunda gilda ákvæði reglugerðar nr. 1077/2004 um aðbúnað og umhirðu gæludýra og dýrahald í atvinnuskyni og þarf leyfi Umhverfisstofnunar fyrir slíkri starfsemi.
Hundahald.
5. Skráningarskylda.
Allir hundar eru skráningarskyldir hjá viðkomandi sveitarstjórn. Skylt er að sækja um skráningu hunds til viðkomandi sveitarstjórnar áður en hundur er tekinn á heimili og eigi síðar en tveim vikum seinna. Fyrir hvolpa skal sækja um leyfi eigi síðar en þegar þeir ná 3ja mánaða aldri. Dveljist hundur tímabundið á eftirlitssvæðinu skal skrá hann til bráðabirgða, slík skráning gildir þó aldrei lengur en 3 mánuði. Skráning skal fara fram sem fyrst og ekki seinna en innan 2ja vikna frá því að hundur kom inn í viðkomandi sveitarfélag. Um gestahunda gilda öll ákvæði þessarar samþykktar. Hund skal skrá á nafn og heimili lögráða einstaklings sem hefur lögheimili í viðkomandi sveitarfélagi og á það heimilisfang þar sem hundurinn er haldinn. Framsal leyfis er óheimilt. Ekki skal skrá fleiri en tvo hunda á sama heimili. Við skráningu hunda getur sveitarfélagið leitað umsagnar lögreglu og annarra eftirlitsumdæma telji það ástæðu til.
6. Gögn sem þarf að framvísa við skráningu.
Eftirfarandi gögn skal leggja fram við skráningu hunds:
* Undirrituð umsókn (umsóknareyðublöð fást á sveitarstjórnarskrifstofum).
* Upplýsingar um heiti, fæðingardag, kyn, tegund og önnur einkenni hundsins.
* Mynd af hundinum (á tölvutæku formi).
* Vottorð frá dýralækni um örmerkingu eða húðflúrmerkingu samanber 3. mgr. 4. gr. reglugerðar nr. 1077/2004 um aðbúnað og umhirðu gæludýra og dýrahald í atvinnuskyni.
* Vottorð frá dýralækni um ormahreinsun hundsins, samanber 57. gr. hollustuháttareglugerðar nr. 941/2002. (Innifalið í árlegu hundaleyfisgjaldi).
* Við skráningu færist dýrið sjálfkrafa inn í tryggingarpakka Seyðisfjarðarkaupstaðar hjá viðurkenndu tryggingafyrirtæki um að hundurinn sé tryggður gagnvart skaða sem hann kann að valda á munum, gróðri, öðrum gæludýrum, skepnum og mönnum. Lágmarkstryggingarupphæð verði kr. 10.000.000,- (tíu milljónir).
* Samþykki allra meðeigenda fjöleignahúss, ef við á, sbr. gr. 7.
Óheimilt er að gefa út skráningarskírteini nema ofangreind gögn liggi fyrir og skráningargjald hafi verið greitt.
Skráðum eiganda hunds ber að tilkynna skriflega innan mánaðar aðsetursskipti eða fráfall hunds.
Heimilt er að afturkalla skráningu hunds ef vanhöld verða á ormahreinsun eða greiðslu á árlegu leyfisgjaldi.
Sveitarstjórn er heimilt að hafna beiðni um skráningu hunds ef umsækjandi og/eða dýrið hafa áður og/eða ítrekað gerst brotleg við samþykkt um hundahald í sveitarfélaginu eða annars staðar.
Dýraeigandi á rétt á skriflegum rökstuðningi ef ósk um skráningu hunds er hafnað, einnig gilda ákvæði stjórnsýslulaga nr. 37/1993 um andmælarétt.
7. Takmarkanir á hundahaldi.
7.1. Húsnæði - fjöleignahús.
Óleyfilegt er að halda hund þar sem enginn býr. Sveitarstjórn getur ákveðið að í húsnæði í eigu sveitarfélags sé ekki heimilt að halda dýr. Um hundahald í fjöleignarhúsum fer að 13. tl. A-liðar 41. gr. laga nr. 26/1994 um fjöleignarhús. Ef sótt er um að halda hund í fjöleignarhúsi, skal skriflegt samþykki allra umráðamanna íbúða í sama stigagangi fylgja umsókn, einnig eigenda viðkomandi húsnæðis sé um leiguhúsnæði að ræða. Sé um að ræða raðhús eða parhús skal samþykki aðliggjandi íbúða (íbúðar) fylgja umsókn. Í fjöleignarhúsi þar sem sér inngangur fylgir íbúð, þarf ekki samþykki allra íbúðaeigenda heldur aðeins aðliggjandi íbúða jafnvel þótt um sé að ræða annars konar sameiginlegt húsrými eða sameiginlega lóð, enda er öll viðvera og/eða umferð hunds um slíkt rými stranglega bönnuð. Brot á því telst alvarlegt brot á samþykkt þessari og skilyrðum leyfisins og varðar sviptingu þess. Afla skal samþykkis nýrra íbúðaeigenda í íbúðum þar sem hundur er fyrir. Íbúðaeigendur geta skriflega afturkallað samþykki sitt. Við afturköllun samþykkis eða synjun nýrra íbúðaeigenda skal hundeigandi fá hæfilegan frest til þess að finna hundinum annan samastað. Óheimilt er að halda hunda í fjöleignarhúsum ef hundur sannanlega veldur eða viðheldur sjúkdómum hjá íbúum.
7.2. Takmarkanir á tegundum hunda.
Bannað er að halda hunda af þeim tegundum sem óheimilt er að flytja til landsins skv. ákvörðun landbúnaðar- og sjávarútvegsráðherra.
Skyldur sveitarfélaga.
8.1. Sveitarfélagi ber að afhenda forsvarsmanni skráningarskírteini eða staðfestingu á að hundur hafi verið skráður til heimilis í viðkomandi sveitarfélagi.
8.2. Sveitarfélög skulu tryggja viðurkennda dýrageymslu sem hefur leyfi Heilbrigðiseftirlits Austurlands og Umhverfisstofnunar skv. hollustuháttareglugerð nr. 941/2002 m.s.br., til vörslu hunda sem þarf að fanga vegna lausagöngu eða brota á samþykkt þessari.
8.3. Sveitarfélögum ber að afhenda dýraeftirlitsmönnum og heilbrigðiseftirliti lista yfir dýr sem eru á skrá.
8.4. Bæjarstjórn getur ákveðið að merkja ákveðin svæði þar sem ekki má vera með hunda, svo sem á fólkvöngum og útivistarsvæðum. Einnig getur bæjarstjórn ákveðið að láta afmarka ákveðin svæði þar sem sleppa má hundum lausum. Svæði þessi skulu auglýst og kynnt sérstaklega fyrir hundaeigendum.
Skyldur eftirlitsaðila.
9.1. Dýraeftirlitsmenn skulu halda saman og uppfæra skrá yfir hunda í viðkomandi sveitarfélagi. Í skránni skulu koma fram allar upplýsingar sem dýraeftirlitsmaður telur skipta máli þ.m.t. hvenær hundarnir hafa verið ormahreinsaðir og öll afskipti sem eftirlitsaðilar hafa haft af dýrinu.
9.2. Heilbrigðisfulltrúar, lögregla og eftir atvikum aðrir starfsmenn sveitarfélaga skulu tilkynna dýraeftirlitsmanni um kvartanir og/eða afskipti sem þessir aðilar hafa vegna hunda.
9.3. Dýraeftirlitsmenn vinna í ábyrgð heilbrigðisnefndar og skv. verklagsreglum sem Heilbrigðisnefnd samþykkir.
10. Skyldur forsvarmanna / hundaeigenda.
10.1. Hundaeiganda ber að sjá til þess að hundur hans sæti ekki illri meðferð. Umhirða hunds skal vera í samræmi við ákvæði reglugerðar nr. 1077/2004 um aðbúnað og umhirðu gæludýra og dýrahald í atvinnuskyni m.a. eftirfarandi: Óheimilt er að hafa hund tjóðraðan án eftirlits ábyrgs aðila. Aðeins er heimilt að tjóðra hunda í undantekningartilvikum ef nauðsyn ber til og þá einungis í stuttan tíma í senn og ekki lengur en 6 klst.
10.2. Hundaeigendum er skylt að færa hunda sína árlega til ormahreinsunar hjá dýralækni og er það innifalið í árlegu leyfisgjaldi sveitarfélagsins.
10.3. Hundaeigendum er skylt að hafa hunda sína tryggða gegn tjóni sem þeir kunna að valda og er það innifalið í árlegu leyfisgjaldi sveitarfélagsins.
10.4. Forsvarsmönnum / hundaeigendum ber árlega að greiða skráningargjald fyrir hund sinn skv. gjaldskrá viðkomandi sveitarfélags.
10.5. Þegar hundur er í festi á lóð skal lengd festarinnar við það miðuð að þeir sem réttmætt erindi eiga inn á lóðina geti óhindrað sinnt þeim.
10.6. Hundur skala hafa ól um hálsinn og á ólinni skal vera merkiplata með nafni hunds, símanúmeri og heimili eiganda.
10.7. Hundur skal aldrei ganga laus heldur vera í taumi í fylgd með aðila sem hefur fullt vald yfir honum eða í tryggu gerði innan lóðar.
10.8. Utan þéttbýlismarka er heimilt að sleppa hundi lausum undir eftirliti umsjónarmanns, án þess þó að gengið sé á rétt viðkomandi landeiganda. Lausir hundar mega ekki vera á skíðasvæðinu í Stafdal.
10.9. Hundar á lögbýlum mega ganga frjálsir á landareign eigenda sinna. Að öðru leyti skulu slíkir hundar háðir ákvæðum samþykktar þessarar.
10.10. Umráðamönnum hunda er alltaf skylt að fjarlægja saur eftir hundinn.
10.11. Hundeiganda eða umráðamanni hunds er skylt að sjá til þess að hundur hans valdi ekki hættu, óþægindum, óþrifnaði eða verði mönnum til óþæginda á neinn annan hátt t.d. með stöðugu eða ítrekuðu gelti eða ýlfri.
10.12. Ef hundur veldur nágrönnum eða öðrum ítrekuðu ónæði, óþrifum eða tjóni, þá ber eiganda eða forráðamanni hundsins að leita leiða til að koma í veg fyrir slíkt.
10.13. Hafi eigandi ástæðu til að ætla að hundur hans sé grimmur eða varasamur skal hann sjá til þess að hundur hans sé ávallt mýldur utan heimilis síns.
10.14. Eigi er leyfilegt að hafa með sér hunda þó í taumi séu inn í opinberar stofnanir, skólahús, matvöruverslanir eða aðra þá staði sem um ræðir í fylgiskjali 3 í reglugerð um hollustuhætti nr. 941/2002, matvælafyrirtæki, samkvæmt ákvæðum reglugerðar um matvælaeftirlit og hollustuhætti við framleiðslu og dreifingu matvæla nr. 522/1994
Framangreindir staðir eru m.a. eftirfarandi:
* Vatnsveitur, vatnsból og verndarsvæði þeirra, brunnar og sjóveitur.
* Almennings- og útisalerni.
* Hvers konar sorpgeymslur og sorpförgunarstaðir.
* Gististaðir, veitingastaðir og matsölustaðir.
* Tjald- og hjólhýsasvæði, nema skv. ákvörðun umsjónaraðila.
* Húsakynni þar sem geymd eru framleidd eða seld matvæli.
* Skólar, kennslustaðir, barnaheimili og gæsluvellir.
* Rakarastofur, hárgreiðslustofur, hvers konar snyrti- og sólbaðsstofur.
* Heilbrigðisstofnanir, hæli, heilsuræktar- og íþróttastöðvar og baðstaðir.
* Fangelsi og aðrar vistarverur handtekinna manna.
* Samkomuhús hvers konar og almennar skrifstofur.
* Kirkjugarðar, bálstofur, líkhús og líkgeymslur.
* Almenn samgöngutæki.
* Ekki má heldur hleypa hundum inn í húsnæði vatnsveitna, sbr. reglugerð um neysluvatn og ölkelduvatn eða inn á verndarsvæði þeirra, þ.e. brunnsvæði. Bannað er að fara með hunda á almennar útisamkomur, brennur og/eða flugeldasýningar.
10.15. Hundaeiganda ber að hlíta lögum og reglum, er hundahald varðar svo og fyrirmælum, sem heilbrigðisnefnd setur.
Brot á samþykkt vegna hundahalds
11.
Vegna brota á samþykkt þessari vísast til VIII. kafla laga nr. 7/1998 um hollustuhætti og mengunarvarnir.
Sveitarstjórn er heimilt hvenær sem er að afturkalla skráningu/leyfi fyrir einstökum hundum eða öll veitt leyfi telji hún það nauðsynlegt í þágu hollustuhátta og öryggismarkmiða. Sé um að ræða alvarlegt brot eða ítrekað vegna sama hunds eða sama hundaeiganda afturkallast viðkomandi skráning vegna hundahalds. Sé um alvarlegt eða ítrekað brot á samþykkt þessari að ræða eða sinni hundeigandi eða umráðamaður hunds ekki fyrirmælum eftirlitsaðila um úrbætur eða breytingu á hegðun hunds getur sveitarstjórn með fulltingi heilbrigðiseftirlits afturkallað skráninguna, bannað viðkomandi eiganda að vera með hund á eftirlitssvæðinu, gert hundeiganda að mýla hundinn eða að koma hundinum fyrir á öðrum stað, viðurkenndum af eftirlitsaðila eða látið fjarlægja hundinn. Leyfishafa er skylt að greiða kostnað sem leiðir af brotum á samþykkt þessari.
12. Lausagönguhundar
Hunda sem ganga lausir á almannafæri er heimilt að handsama og færa í sérstaka dýrageymslu, sbr. gr. 8.3.
Handsömun á ómerktum hundi skal auglýsa tryggilega, t.d. í staðarblaði.
* Óheimilt að afhenda hundinn fyrr en búið er að skrá hann í samræmi við 5 gr.
* Eigandi hundsins getur fengið hann afhentan að aflokinni skráningu, og gegn framvísun á staðfestingu fyrir greiðslu skráningargjalds og handsömunargjalds auk annars áfallins kostnaðar vegna brotsins, sbr. gjaldskrá viðkomandi sveitarfélags.
* Gefi eigandi óskráðs hunds sig ekki fram innan sjö sólarhringa getur dýraeftirlitsmaður tekið ákvörðun um að hundur verði aflífaður, ráðstafað honum til nýs ábyrgs eiganda eða selt hann fyrir áföllnum kostnaði.
* Sé skráður hundur handsamaður skal tilkynna eiganda strax um handsömun hans og hvað vanræksla á að vitja hundsins getur haft í för með sér. Ef eigandi vitjar hunds eigi innan sjö sólarhringa getur dýraeftirlitsmaður tekið ákvörðun um að hundur verði aflífaður án frekari fyrirvara, ráðstafað honum til nýs ábyrgs eiganda. Áfallinn kostnaður greiðist af eiganda.
13. Bit og hætta
Hafi hundur bitið mann, skepnu, gæludýr og/eða er hættulegur getur dýraeftirlitsmaður í samráði við heilbrigðiseftirlit, tjónþoli eða forráðamaður hans krafist þess að hundurinn verði aflífaður þegar í stað.
Óski hundeigandi þess skal leita álits sérfróðs aðila, dýralæknis eða hundaþjálfara sem Heilbrigðiseftirlit viðurkennir áður en ákvörðun um aflífun er tekin. Meðan mál hunds er í skoðun er eiganda skylt að hafa hundinn í samþykktri dýrageymslu eða mýla hundinn þegar hann er utandyra.
5. kafli. Gjaldtaka.
14. Skráningargjald.
Sveitarstjórnum á Austurlandi er heimilt að innheimta skráningar- og eftirlitsgjöld í samræmi við gjaldskrá sem viðkomandi sveitarfélag setur á grunni 5. mgr. 25. gr. laga um hollustuhætti og mengunarvarnir nr. 7/1998 m.s.br. og að fenginni umsögn heilbrigðisnefndar. Gjaldskrána skal birta í B-deild Stjórnartíðinda. Í gjaldskránni skal koma fram hvað er innifalið í skráningargjaldi. Skráningargjald skal í fyrsta sinn greitt við skráningu hunds og síðan árlega fyrirfram. Gjöld mega aldrei vera hærri en sem nemur rökstuddum kostnaði við veitta þjónustu eða framkvæmd eftirlits með einstökum þáttum.
15. Handsömunargjald.
Í gjaldskránni skal ákveðið handsömunar- og vörslugjald vegna handsömunar lausagönguhunda eða hunda sem teknir eru í vörslu á vegum sveitarfélaga vegna brota á samþykkt þessari.
16. Forsendur upphæða
Við ákvörðun gjalda skal tekið mið af þeim kostnaði sem leiðir af framkvæmd þessarar samþykktar.
Gjöld mega aldrei vera hærri en sem nemur rökstuddum kostnaði við veitta þjónustu eða framkvæmd eftirlits með einstökum þáttum.
17. Undanþágur frá gjaldskyldu
Hundar sem notaðir eru við búrekstur á lögbýlum eru undanþegnir skráningargjaldi, en skylt er að framvísa til sveitarfélags eða dýragæslumanns árlegu vottorði um ormahreinsun og merkingu.
Sveitarstjórn getur fellt niður eða ákveðið lægra gjald fyrir hunda sem notaðir eru til löggæslu- eða björgunarstarfa og minkahunda svo og fyrir hunda sem að læknisráði eru notaðir til aðstoðar blindu fólki og fötluðu.
Valdsvið og þvingunarúrræði
18. Um valdsvið og þvingunarúrræði vísast til VI. kafla laga nr. 7/1998 um hollustuhætti og mengunarvarnir.
Brot gegn samþykkt þessari varða sektum rúmist þau jafnframt innan refsiákvæða hlutaðeigandi laga, nema þyngri refsing liggi við samkvæmt öðrum lögum. Skulu þau brot sæta þeirri málsmeðferð sem boðin er í lögum nr. 19/1991 um meðferð opinberra mála. Um málskot fer samkvæmt lögum nr. 7/1998 um hollustuhætti og mengunarvarnir.
Gildistaka.
19. Samþykkt þessi sem er samin af Heilbrigðiseftirliti Austurlands og samþykkt í sveitarstjórn Seyðisfjarðarkaupstaðar þann 9. júní 2009 staðfestist hér með skv. 25. gr. laga nr. 7/1998 um hollustuhætti og mengunarvarnir, með síðari breytingum, til þess að öðlast gildi þegar við birtingu. Um leið fellur úr gildi samsvarandi samþykkt frá 08.05.98. Ákvæði til bráðabirgða. Leyfi til hundahalds á eftirlitssvæðinu, sem veitt hafa verið fyrir gildistöku samþykktar þessarar, verður breytt í skráningu. Að öðru leyti gildir samþykktin að fullu um þau leyfi. Hundar sem ekki eru á skrá viðkomandi sveitarfélags skulu færðir til skráningar fyrir 8. júlí 2009.
Samþykkt um kattahald í Seyðisfjarðarkaupstað.
Gildir einnig fyrir öll önnur gæludýr fyrir utan ketti og hunda .
Stjórnsýsla
1. Kattahald er takmarkað í Seyðisfjarðarkaupstað með skilyrðum samkvæmt samþykkt þessari.
2. Dýraeftirlitsmenn.
Sveitarstjórnir annast framkvæmd samþykktar þessarar og geta ráðið sérstaka dýraeftirlitsmenn eða falið starfsmönnum sveitarfélaganna hlutverk dýraeftirlitsmanna. Dýraeftirlitsmenn geta leitað aðstoðar lögregluyfirvalda ef og þegar þörf krefur, t.d. ef köttur er að mati eftirlitsmanns hættulegur umhverfi sínu og/eða vörsluaðili kattarins tálmar starfi eftirlitsmanns samkvæmt samþykkt þessari og almannahagsmunir og/eða heilbrigðissjónarmið valda því að nauðsynlegt er að leita atbeina lögreglu við að fjarlægja kött. Að öðru leyti starfar dýraeftirlitsmenn undir eftirliti og á ábyrgð heilbrigðisnefndar við sín eftirlitsstörf.
3. Þéttbýli - dreifbýli.
Með þéttbýli er átt við þyrpingu húsa þar sem búa a.m.k. 50 manns og fjarlægð milli húsa fer að jafnaði ekki yfir 200 metra (sbr. skipulags- og byggingarlög 1997 nr. 73/1997) nema ef sveitarfélag hefur skilgreint þéttbýli nánar í sínu aðalskipulagi.
4. Dýravernd og ræktun.
Samkvæmt lögum um dýravernd nr. 15/1994 fer Umhverfisstofnun með mál er varða dýravernd.
Um ræktun og sölu gæludýra gilda ákvæði reglugerðar nr. 1077/2004 um aðbúnað og umhirðu gæludýra og dýrahald í atvinnuskyni og þarf leyfi Umhverfisstofnunar fyrir slíkri starfsemi.
Kattahald.
5. Skráningarskylda.
Allir kettir í þéttbýli eru skráningarskyldir. Kattahald í dreifbýli sætir að öllu jöfnu ekki takmörkunum. Þó getur sveitarstjórn, telji hún og héraðsdýralæknir brýna þörf á, takmarkað kattahald í dreifbýli. Skylt er að sækja um skráningu kattar í þéttbýli til viðkomandi sveitarstjórnar áður en köttur er tekinn á heimili og eigi síðar en tveim vikum seinna. Fyrir kettlinga skal sækja um leyfi eigi síðar en þegar þeir ná 3ja mánaða aldri. Ketti skal skrá á nafn og heimili lögráða einstaklings sem hefur lögheimili í viðkomandi sveitarfélagi og á það heimilisfang þar sem kötturinn er haldinn. Framsal leyfis er óheimilt. Ekki er heimilt að skrá fleiri en tvo ketti á hvert heimili. Við skráningu kattar getur sveitarfélagið leitað umsagnar lögreglu og annarra eftirlitsumdæma telji það ástæðu til. Sveitarstjórn er heimilt hvenær sem er að afturkalla skráningu einstakra katta eða allar skráningar telji hún það nauðsynlegt í þágu hollustuhátta og öryggismarkmiða.
6. Gögn sem þarf að framvísa við skráningu.
Eftirfarandi gögn skal leggja fram við skráningu kattar:
Undirrituð umsókn (umsóknareyðublöð fást á sveitarstjórnarskrifstofum).
* Upplýsingar um heiti, fæðingardag, kyn, tegund og önnur einkenni kattarins.
* Mynd af kettinum (á tölvutækuformi).
* Vottorð frá dýralækni um örmerkingu eða húðflúrmerkingu samanber 3. mgr. 4. gr. reglugerðar nr. 1077/2004 um aðbúnað og umhirðu gæludýra og dýrahald í atvinnuskyni.
* Vottorð frá dýralækni um ormahreinsun kattarins, samanber 58. gr. hollustuháttareglugerðar nr. 941/2002.
* Við skráningu færist dýrið sjálfkrafa inn í tryggingapakka Seyðisfjarðarkaupstaðar hjá viðurkenndu tryggingafyrirtæki um að kötturinn sé tryggður gagnvart skaða sem hann kann að valda á munum, gróðri, öðrum gæludýrum og mönnum. Lágmarks tryggingarupphæð skal vera kr. 10.000.000,- (tíu milljónir.)
* Samþykki allra meðeigenda fjöleignahúss sbr. gr. 7.
Óheimilt er að gefa út skráningarskírteini nema ofangreind gögn liggi fyrir:
Skráðum eiganda kattar ber að tilkynna skriflega innan mánaðar aðsetursskipti eða fráfall dýrs.
Sveitarstjórn er heimilt að hafna beiðni um skráningu kattar ef umsækjandi og/eða dýrið hafa áður og/eða ítrekað gerst brotleg við samþykki um kattahald í sveitarfélaginu eða annars staðar.
Dýraeigandi á rétt á skriflegum rökstuðningi ef ósk um skráningu kattar er hafnað, einnig gilda ákvæði stjórnsýslulaga nr. 37/1993 um andmælarétt.
7. Takmarkanir á kattahaldi - húsnæði.
Um kattahald í fjöleignarhúsum fer að 13. tl. A-liðar 41. gr. laga nr. 26/1994 um fjöleignarhús. Til að halda kött í fjöleignarhúsi þarf samþykki allra eigenda. Þegar hús skiptist í aðgreinda hluta nægir samþykki þeirra eigenda sem hafa sameiginlegan inngang, stigagang eða annað sameiginlegt húsrými. Óheimilt er þó að halda ketti í fjöleignarhúsum ef kattahaldið sannanlega veldur eða viðheldur sjúkdómum hjá íbúum. Sveitarfélögum er heimilt að banna kattahald í húsnæði í eigu sveitarfélagsins.
Skyldur aðila.
8. Skyldur sveitarfélaga
8.1. Sveitarfélagi ber að afhenda forsvarsmanni ábyrgðarskýrteini eða staðfestingu á að köttur hafi verið skráður til heimilis í viðkomandi sveitarfélagi.
8.2. Sveitarfélög skulu tryggja viðurkennda dýrageymslu sem hefur leyfi Heilbrigðiseftirlits Austurlands og Umhverfisstofnunar skv. hollustuháttareglugerð nr. 941/2004 m.s.br til vörslu katta sem fangaðir eru í samræmi við samþykkt þessa.
8.3. Sveitarfélögum ber að afhenda dýraeftirlitsmönnum og heilbrigðiseftirliti lista yfir dýr sem eru á skrá.
Skyldur eftirlitsaðila.
9.1. Dýraeftirlitsmenn skulu halda saman og uppfæra skrá yfir ketti í viðkomandi sveitarfélagi. Í skránni skulu koma fram allar upplýsingar sem dýraeftirlitsmaður telur skipta máli þ.m.t. hvenær kettirnir hafa verið ormahreinsaðir og öll afskipti sem eftirlitsaðilar hafa haft af dýrinu.
9.2. Heilbrigðisfulltrúar, lögregla og eftir atvikum aðrir starfsmenn sveitarfélaga skulu tilkynna dýraeftirlitsmanni um kvartanir og/eða afskipti sem þessir aðilar hafa vegna katta.
9.3. Dýraeftirlitsmenn vinna í ábyrgð heilbrigðisnefndar og skv. verklagsreglum sem Heilbrigðisnefnd samþykkir.
10. Skyldur kattaeigenda
10.1. Kattaeigendum ber að sjá til þess að kettir þeirra sæti ekki illri meðferð. Umhirða katta skal vera í samræmi við ákvæði reglugerðar nr. 1077/2004 um aðbúnað og umhirðu gæludýra og dýrahald í atvinnuskyni m.a. eftirfarandi: Ekki skal skilja kött eftir einan og eftirlitslausan lengur en nauðsynlegt er og að hámarki í einn sólarhring. Ekki skal tjóðra ketti nema í undantekningartilvikum og þá einungis í skamma stund í senn og undir stöðugu eftirliti. Óheimilt er að halda ketti í lokuðu, gluggalausu rými.
10.2. Kattaeigendum er skylt að færa ketti sína árlega til ormahreinsunar hjá dýralækni og er innifalið í árlegu leyfisgjaldi sveitarfélagsins.
10.3. Kattaeigendum er skylt að hafa ketti sína tryggða gegn tjóni sem þeir kunna að valda og er það innifalið í árlegu leyfisgjaldi sveitarfélagsins.
10.4. Kattaeigendum ber árlega að greiða skráningargjald fyrir ketti sína skv. gjaldskrá viðkomandi sveitarfélags.
10.5. Auk örmerkis skulu kettir bera hálsól með upplýsingum um heimilisfang eiganda og símanúmer.
10.6. Kattaeigendum ber að sjá til þess að högnar séu geldir og að læður séu gerðar ófrjóar eða hafðar á pillunni.
10.7. Eiganda kattar ber, eftir því sem framast er unnt, að sjá svo um að köttur hans valdi ekki hávaða, ónæði, óþrifnaði né óhollustu. Kattaeigendum ber að hafa sandkassa fyrir köttinn á lóð sinni.
10.8. Ef köttur veldur nágrönnum eða öðrum ítrekuðu ónæði, óþrifum eða tjóni, þá ber eiganda eða forráðamanni að leita leiða til að koma í veg fyrir slíkt.
10.9. Kattaeigendum ber að taka tillit til fuglalífs á varptíma, eftir því sem tök eru á, t.d. með því að hengja bjöllur á hálsólar katta og halda þeim ávallt innandyra á nóttinni.
10.10. Ekki má hleypa köttum inn í húsrými eða á lóðir sem fjallað er um í fylgiskjali 3 með reglugerð um hollustuhætti nr. 941/2002 né heldur húsnæði þar sem matvæli eru meðhöndluð. Slíkir staðir eru m.a.:
* Heilbrigðis- og meðferðarstofnanir.
* Skólar.
* Lækna- og tannlæknastofur.
* Sjúkrahús og aðgerðarstofur.
* Vistarverur handtekinna manna.
* Heilsuræktarstöðvar.
* Íþróttastöðvar og íþróttahús.
* Gæsluvellir.
* Snyrtistofur.
* Nuddstofur og sjúkraþjálfun.
* Sólbaðsstofur.
* Húðflúrstofur.
* Samkomuhús, s.s. kirkjur, leikhús, hljómleikasalir, söfn og kvikmyndahús.
* Gististaðir.
* Veitingastaðir.
* Sumarbúðir fyrir börn.
* Um matvælafyrirtæki fer samkvæmt ákvæðum reglugerðar um matvælaeftirlit og hollustuhætti við framleiðslu og dreifingu matvæla nr. 522/1994 m.s.br.
11. Förgun katta
Sveitarstjórn er heimilt að láta veiða ketti í búr í eftirfarandi tilfellum:
1. Ef köttur er ómerktur.
2. Ef ítrekað er kvartað undan ágangi katta á tilteknu svæði.
3. Ef köttur finnst innandyra hjá nágranna í leyfisleysi, á öðrum óheimilum stað eða án tilskilins samþykkis í fjöleignarhúsi.
Kettir, sem fangaðir eru skv. 1. tl. og kettir sem haldnir eru í fjöleignarhúsum, án samþykkis meðeigenda/íbúa, sbr. 1. tl. 4. gr., skulu færðir í dýrageymslu skv. gr. 8.2. Öðrum köttum skal sleppa lausum, en eigendum eða umráðamönnum tilkynnt um handsömunina og ástæður hennar.
Komi ítrekað til handsömunar á ketti vegna ónæðis telst það vera brot á samþykkt þessari. Köttur, sem hefur verið handsamaður ítrekað, skal færður í dýrageymslu. Tilkynna skal eigendum ef merktir kettir eru teknir úr umferð.
* Eigandi kattarins fær köttinn afhentan gegn greiðslu handsömunar-, fóður- og vistunargjald skv. gjaldskrá um kattahald í sveitarfélaginu.
* Ef eigandi vitjar ekki kattarins innan viku, er heimilt að finna kettinum annað heimili, selja hann upp í áfallinn kostnað eða farga kettinum án frekari fyrirvara.
* Kattareigandi ber allan kostnað af handsömun, vörslu, fóðrun og aflífun, ef til hennar kemur
Ef kettir eru ekki merktir og ef ekki er unnt að bera kennsl á þá skal auglýsa eftir eiganda. Gefi eigandi sig ekki fram innan sjö sólarhringa frá birtingu auglýsingar er lögreglu eða dýraeftirlitsmanni heimilt að láta lóga viðkomandi ketti án frekari fyrirvara. Eigandi sem gefur sig fram skal því aðeins fá köttinn afhentan að hann láti skrá köttinn og uppfylli öll skilyrði reglugerðar þessarar.
Aðgerðir gegn villiköttum.
Meiriháttar föngun villikatta í þéttbýliskjörnum skal auglýsa með a.m.k. viku fyrirvara og með tilmælum um að heimilisköttum sé haldið innan dyra.
Viðurlög:
12. Brot á samþykkt vegna kattahalds
Vegna brota á samþykkt þessari vísast til VIII. kafla laga nr. 7/1998 um hollustuhætti og mengunarvarnir
Við minniháttar brot á samþykkt þessari skal eigandi kattarins sæta skriflegri áminningu.
Sé um að ræða alvarlegt brot eða ítrekað vegna sama dýrs eða sama dýraeiganda afturkallast viðkomandi skráning.
Kattaeiganda er skylt að greiða allan kostnað sem leiðir af brotum á samþykkt þessari.
Gjaldtaka.
13. Skráningargjald
Sveitarstjórnum á Austurlandi er heimilt að innheimta skráningar- og eftirlitsgjöld í samræmi við gjaldskrá sem viðkomandi sveitarfélag setur á grunni 5. mgr. 25. gr. laga um hollustuhætti og mengunarvarnir nr. 7/1998 m.s.br. og að fenginni umsögn heilbrigðisnefndar. Í gjaldskránni skal koma fram hvað er innifalið í skráningargjaldi. Skráningargjald skal í fyrsta sinn greitt við skráningu kattar og síðan árlega fyrirfram.
14. Handsömunargjald
Í gjaldskránni skal kveðið á um handsömunar- og vörslugjald vegna handsömunar katta sem teknir eru í vörslu á vegum sveitarfélaga vegna brota á samþykkt þessari.
15. Forsendur upphæða
Við ákvörðun gjalda skal tekið mið af þeim kostnaði, sem leiðir af framkvæmd þessarar samþykktar.
Gjöld mega aldrei vera hærri en sem nemur rökstuddum kostnaði við veitta þjónustu eða framkvæmd eftirlits með einstökum þáttum. Gjaldskrána skal birta í B-deild Stjórnartíðinda
Önnur gæludýr.
16. Eiganda og umráðamanni gæludýra annarra en hunda og katta er skylt að koma í veg fyrir að dýrin sleppi úr haldi. Gerist það skal þegar gera ráðstafanir til að handsama dýrið. Eigendum gæludýra sem haldin eru utandyra , t.d. kanínur eða nagdýr, skulu sjá til þess að þau valdi ekki nágrönnum ama svo sem með hávaða eða óhreinindum. Tryggja skal að dýr geti ekki nagað sig út úr búri eða aðhaldi.
Valdsvið og þvingunarúrræði.
17. Vegna brota á samþykkt þessari vísast til VIII. kafla laga nr. 7/1998 um hollustuhætti og mengunarvarnir.
Brot gegn samþykkt þessari varða sektum rúmist þau jafnframt innan refsiákvæða hlutaðeigandi laga, nema þyngri refsing liggi við samkvæmt öðrum lögum. Skulu þau brot sæta þeirri málsmeðferð sem boðin er í lögum nr. 19/1991 um meðferð opinberra mála. Um málskot fer samkvæmt lögum nr. 7/1998 um hollustuhætti og mengunarvarnir.
Gildistaka.
18. Samþykkt þessi sem er samin af Heilbrigðiseftirliti Austurlands og samþykkt í sveitarstjórn 09.06.09. Staðfestist hér með skv. 25. gr. laga nr. 7/1998 um hollustuhætti og mengunarvarnir, með síðari breytingum, til þess að öðlast gildi þegar við birtingu. Um leið fellur úr gildi samsvarandi samþykkt frá 08.05.98.
Ákvæði til bráðabirgða.
Leyfi til kattahalds á eftirlitssvæðinu, sem veitt hafa verið fyrir gildistöku samþykktar þessarar, verður breytt í skráningu. Að öðru leyti gildir samþykktin að fullu um þau leyfi. Kettir í þéttbýli, sem ekki eru á skrá viðkomandi sveitarfélags skulu færðir til skráningar fyrir 8. júlí 2009.
|
Samþykkt um hunda- og kattahald 
