Tilkynning vegna samkomubanns

M J Ö G - Á R Í Ð A N D I
Mynd fengin af vef. Pössum hvert annað, sýnum umburðarlyndi og tökum ábyrgð.
Mynd fengin af vef. Pössum hvert annað, sýnum umburðarlyndi og tökum ábyrgð.

Kæru íbúar

Stjórnendur og starfsfólk sveitarfélagsins hafa lagt sig fram við það undanfarna daga að undirbúa viðbrögð við samkomubanni sem nú hefur tekið gildi.

Ljóst er að starfsemi og þjónusta sveitarfélagsins verður með breyttu sniði næstu fjórar vikurnar. Fólk er eindregið hvatt til að nota síma eða tölvupóst eins mikið og hægt er, í stað þess að koma á bæjarskrifstofu, í áhaldahús eða á hafnarskrifstofuna.

Allt skipulag skólahalds sveitarfélagsins miðast að því að fara í einu og öllu eftir fyrirmælum yfirvalda um samkomubann. Breytingar á starfsemi sveitarfélagsins geta skollið á með stuttum fyrirvara og verða þá tilkynntar á heimasíðu sveitarfélagsins eða beint frá þeim stofnunum eða einingum sem við á.

Allir íbúar eru hvattir til að leita almennra upplýsinga um faraldurinn og viðbrögð við honum inni á www.covid.is - þar er að finna allar nauðsynlegar upplýsingar sem gilda næstu fjórar vikurnar.

Helstu ákvarðanir sem teknar hafa verið hjá Seyðisfjarðarkaupstað eru eftirfarandi:

Seyðisfjarðarskóli, leikskóladeild

Stefnt er að því að skólastarf verði eins hefðbundið og mögulegt er. Þetta er mikilvægt samfélagslegt ábyrgðarhlutverk og varðar sérstaklega vellíðan barnanna í skólanum okkar.

Biðlað er til foreldra um að hafa börn heima ef hægt er og að stytta vistunartíma eins og fólk treystir sér til, til að létta undir með starfsfólki. Hópar eða deildir eiga ekki að blandast. Gestir/foreldrar eru ekki leyfðir í húsinu, tekið verður á móti nemendum í fataklefanum. Engar afleysingar verða á milli deilda, sama dag. Leikföngum verður fækkað og starfið verður einfaldað eins og hægt er. Verði einhver starfsmaður almennt veikur eða er fjarverandi er skoðað að senda börn heim. Foreldrar þurfa að vera vakandi fyrir símtölum frá leikskólanum. Við skilgreinum forgangshóp sem þolir minnst þjónustuskerðingu komi til lokana vegna manneklu. Reynt verður að tryggja þessum hópi þjónustu í lengstu lög.

  • Börn heilbrigðisstarfsfólks njóta forgangs
  • Börn fólks sem vinnur í skólakerfinu njóta forgangs
  • Möguleg önnur tilfelli skoðuð af stjórnendum
  • Búast má við þjónustuskerðingu vegna manneklu.

Seyðisfjarðarskóli, grunnskóladeild

Til að mæta kröfunum sem gerðar eru vegna samkomubanns leggja stjórnendur til eftirfarandi grundvallarbreytingu á dagsskipulaginu.

Bekkir, hópar eða stig eiga ekki að blandast, hvorki í tímum, mötuneyti né frímínútum. Stundaskrár eru því ekki lengur í gildi. Kennarar fara ekki á milli hópa.

Engar afleysingar verða á milli hópa sama daginn. Engir gestakennarar/foreldrar/gestir eru leyfðir að óþörfu. Hvorki Austurlandslíkan né Skólaskrifstofa munu halda úti þjónustu með heimsóknum. Óheimilt er að nýta verkgreinastofur, íþróttahús og sundlaug undir rúllandi kennslu (mismunandi hópa). Rauði skóli er einungis nýttur undir tónlistarkennslu og starfsemi Skólasels. 

Seyðisfjarðarskóli, listadeild

Stefnt er að því að halda áfram eins hefðbundnu starfi og hægt er í tónlistaskólanum. Tónlist er áfram kennd. Ekkert tónleikahald er ráðgert. Félagsstarf á vegum skólans fellur niður. 

Skólasel 

Verður í boði fyrir 1. og 2. bekk. Það getur komið upp sú staða að það þurfi að fella niður skóladag vegna veikinda eða fjarveru starfsfólks. Það getur átt við einstaka hópa, einn eða fleiri í einu eftir atvikum. Hefðbundin íþróttakennsla, sundkennsla og list- og verkgreinar falla niður í þeirri mynd sem við þekkjum.

Mötuneyti

Verður lokað nemendum. Nemendur  í 1.-7.bekk þurfa því að koma með nesti í skólann. Þau fá eftir sem áður ávexti á venjulegum tíma að morgni. Nemendur í 8.-10. bekk eiga að fara heim í matartímanum.

Skólinn opnar á hefðbundnum tíma 7:50 og eru nemendur beðnir um að fara beint í sínar stofur. Séu nemendur eða aðstandendur þeirra í áhættuhópi vegna COVID-19 smits biðjum við ykkur að hafa samband við umsjónarkennara eða aðstoðarskólastjóra. Nemendur sem eru slappir eða kvefaðir eiga að vera heima. Foreldrar sem fara í sóttkví hafa börnin sín heima. Ef nemendur eða fjölskyldumeðlimur smitast af COVID-19 er mikilvægt að láta aðstoðarskólastjóra vita.  Gert er ráð fyrir að  möguleikinn á fjarkennslu verði undirbúinn næstu daga, komi til hennar.

Bókasafn

Opnunartími er óskertur en þjónusta verður með eftirtöldum hætti á meðan samkomubann er í gildi. Tímarit eru til útláns eingöngu, ekki er leyfilegt að skoða þau á safninu. Öll leikföng á barnadeild hafa verið tekin úr umferð. Mælst er til þess að viðskiptavinir virði tilmæli um 2 metra fjarlægð. Þegar bókum er skilað eru þær sótthreinsaðar og verða ekki lánaðar aftur samdægurs.

Íþróttahús

Fjöldatakmarkanir í líkamsræktarstöð miðast við 8 manneskjur í einu og 90 mínútur á hvern einstakling í senn. Lokað er í ljósabekk, gufu og heitan pott á meðan samkomubann er í gildi. Bæjaryfirvöld hvetja fólk til að sýna heilbrigða skynsemi og mæta ekki í íþróttamannvirki með flensueinkenni eða grun um að hafa verið í samneyti við smitaða einstaklinga.

Íþróttafélag og deildir innan Hugins geta útfært æfingar í íþróttahúsi í samræmi við leiðbeiningar frá yfirvöldum, en mælst er til þess að fylgja tilmælum ÍSÍ/UMFÍ um að nota tímann fram að 23. mars til þess að vinna í útfærslum og endurskoðun á æfingaplönum.

Íþróttastarfi barna hefur verið frestað alfarið til 23. mars, en þá verður starfið endurskoðað.

Sundhöll 

Lokað verður í gufu. Sundgestir eru beðnir um að virða fjarlægðar- og fjöldatakmarkanir sem gefnar eru út af Almannavörnum. Bæjaryfirvöld hvetja fólk til að sýna heilbrigða skynsemi og mæta ekki í íþróttamannvirki með flensueinkenni eða grun um að hafa verið í samneyti við smitaða einstaklinga.

Félagsheimilið Herðubreið 

Verður lokað á meðan samkomubann er í gildi og allir viðburðir sem þar hafa verið auglýstir falla niður.

Félagsþjónusta Fljótsdalshéraðs og Seyðisfjarðarkaupstaðar 

Mest allt félagsstarf á vegum kaupstaðarins fyrir eldri borgara fellur niður á meðan að samkomubann er í gildi. Skert starfsemi verður einnig hjá heimaþjónustu. 

Skíðasvæðið í Stafdal

Skíðasvæðið er opið. Skíðaiðkendur eru beðnir um að virða takmarkanir yfirvalda, halda 2 metrum á milli í röð við lyftur, hafa gott pláss í skála og virða ráð um 2metra á milli fólks, auk þess að staldra ekki lengur inn í skála en þarf til að næra sig. Þvo hendur og spritta. Almennt fara eftir ráðleggingum yfirvalda um covid-19. Iðkendur eru hvattir til þess að kaupa miða og viðhafa önnur samskipti við lyftuverði í gegnum lúgu. Á skíðasvæðinu hefur verið aukið við sprittglös í skála og hann þrifinn reglulega

 

ATH. ofangreindar upplýsingar eru settar fram miðað við stöðu mála í dag, þriðjudaginn 17. mars.


Nú fer í hönd fordæmalaus tími þar sem við þurfum öll að standa saman og sýna samfélagslega ábyrgð í því hvernig við heftum covid-19 faraldurinn. Hugum vel að eldra fólkinu okkar sem og hvert að öðru. Notum símann til að heyra í fólki sem við vitum að er eitt heima, hjálpumst að, hugum að nágrönnunum en munum líka að öll él styttir upp um síðir og það er ýmislegt skemmtilegt hægt að gera úti í fallegu náttúrunni okkar og heima í faðmi fjölskyldunnar.

Að lokum vil ég  þakka starfsfólki og stjórnendum kaupstaðarins kærlega fyrir skjót viðbrögð við bráðavanda. Og um leið biðja bæjarbúa að sýna ástandinu umburðarlyndi og skilning. Viðbragðsáætlun kaupstaðarins hefur verið gerð og mun birtast hér á vefsíðunni.

Bæjarstjóri