Til bæjarbúa - mötuneyti í Herðubreið

Hefst í dag 11. október

Af óviðráðanlegum ástæðum mun Seyðisfjarðarskóli þurfa að breyta fyrirkomulagi varðandi hádegismat. Skólinn, félagsheimilið Herðubreið, Hótel Aldan og LungA Skólinn ætla að vinna saman að því að bjóða nemendum og íbúum upp á hádegismat í Herðubreið frá og með í dag, 11. október og fram að áramótum.

Skaftfell / Hótel Aldan ætlar að sjá um eldamenskuna í hádeginu fyrir leik- og grunnskóladeildir sem og LungA Skólann fram að áramótum. Nemendur grunnskóladeildar matast á hefbundnum tíma, en frá klukkan 12:15 munu nemendur LungA Skólans og aðrir gestir geta borðað hádegismat, einnig í Herðubreið. Grunnskólafólk borðar í matsalnum en aðrir snæða sinn hádegisverð frammi á kaffihúsasvæðinu. Nemendur í leikskóladeild verða ekki varir við þessa breytingu en þó munu allir fá aðeins öðruvísi mat.

Þetta fyrirkomulag verður prófað fram að áramótum en þegar nær dregur desember verður staðan endurmetin í ljósi þess hvernig fyrirkomulagið gengur og hvort þörf sé á þessari lausn áfram.

Matseðlar verða gefnir út og verða aðgengilegir á vef skólans. Að sjálfsögðu verður farið að manneldismarkmiðunum og boðið upp á næringaríkan og fjölbreyttan mat samkvæmt stefnu heilsueflandi skóla. 

Á þennan hátt fæst séð hvernig Herðubreið, sem félagsheimili bæjarins, gæti  boðið upp á mat í hádeginu fyrir samfélagið í heild. Það gæti sannarlega styrkt samfélagið að hafa stað þar sem hægt er að koma saman, eiga ljúfa stund og borða hádegismat. 

Þar sem þarf að bregðast skjótt við tekur þessi breyting gildi í dag, föstudaginn 11.október, með föstudagskjúlla.

 

Svandís Egilsdóttir, skólastjóri.